كنا عايشين غي انا و ماما بابا فاش كانت عندي عامين طلق ماما و بقينا ف ديور لكرا كاريين ماما كتخرج ف صباح كترجع تا لعشية فين كتمشي لله و أعلم كنت مزال صغيرة مكنعرف والو المهم كانت ديما كتجيب ليا احسن لحوايج و غي الماركة الغالية و سبابط و اي حاجة كيبغيوها دراري صغار و نعم الام كانت كتبغيني لدرجة غي لا تجرحت ولا تقاسيت كتبقی تبكي و تويل و تقول سمحي لي بنتي انا لي خليتك بوحدك ف دار المهم حنينة و ضريفة و واعية و مثقفة اي بنت كتحلم تكون عندها ام بحال الام ديالي المهم كنت كنقرا فمدرسة ديال لفلوس و كنقرا مع ناس راقيين و من طبقات غنية واخا كنت فقيرة كنت كنقرا تم حيت الام ديالي خدامة مزيان و كتخلص عليا باش نوصل لشي مرتبة زوينة المهم كنت قراية و من ناس الاوائل وصلت لسادس نجحت دارت لي احسن حفلة و كنت فرحانة عرضت علی صحاباتي و لبست كسيوة حمرة و قادات لي احسن مشطة و الماكياج هههه كانت ماما كتصفق بالفرحة و تا انا كنتبعكك و نقول لصحاباتي مرحبا بيكم تفضلو كولو شربو المهم عشت صغري لوووووز طووووب

   المهم من وصلت ل ديك 13 عام ماما قالت لي انرحلو لمراكش قلت ليها لا علاش انا را هنا كبرت هنا كاينين صحابي و صحاباتي قالت لي صافي بلا ما تبقاي تهضري بزاف قلت ليك انرحلو هي غنرحلو قلت ليها علاش اماما بليز خلينا غي هنا انا ولفت قالت لي صافي سكتي وليتي كتهضري بزاف كيف هنا كيف لهيه واش هنا كان ناقصك شي خير قلت ليها لا قالت لي تا لهيه مغينقصك تا خير ديما بنتي الوحيدة غنعيشها اميرة و نديرها تاج فوق راسي يالله سيري جمعي حوايجك هاد سيمانة انرحلو لبسات و تقادات و خرجات سدات لباب و بقيت بوحدي ف دار كنتفرج و كنتفكر اش فندير دابة واش نمشي معاها ولا لا بفف حرت اش غندير عاد غنعاود ندير بلاصتي ف ديك لمدينة ولا شنو معرفت كيف غيكونو ناسها

المهم تقبلت امر الواقع و ما بغيتش نخسر لماما خاطرها حيت هي مكتخسرش لي خاطري المهم قلت ليها انا غنجمعهم مي بشرط قالت لي أمرر و تشرطي ا فنكوشتي قلت ليها قبل ما نرحلو اتديني نتسارا ف مدينتي لأخر مرة بغيت ندور رباط كاااااااملة و ناكل ف احسن لبلايص قالت لي هههعه صافي جاتك انا غنمشي دابة نجي نلقاك بديتي تجمعي المهم فرحت مشيت بديت كنجمع حوايجي قاديتهم جات ماما ف ليل قلت ليها ماما تعطلتي حرام عليك كاعما ديتيني ندور قالت لي صافي ابنتي را دكدكاتني لخدمة عييت قلت ليها بففف دابة شنو قالت لي كلسي كلست جبدات لي واحد لميكة قلت ليها شنو هادي قالت لي حلي حليتها لقيت كسوة واعرة صواغية و كتبري و سباط قلت ليها هادو ليا قالت لي اه ا كبيدة غدا اهفيقو بكري مع تسعود غتلبسيها و غنخرجو قلت ليها شكرا ا مامي و عنقتها و بستها قالت لي يالله نوضي دابة انمشي نوجد شي حاجة نتعشاو بيها مشات بدلات حوايجها و دخلات الكوزينة بحال اي ام مغربية واخا عيانة بغات طيب لينا لعشا و تفرح بنتها و دير ليها خاطرها باش متبقاش مقلقلة من فكرة انها غترحل من مدينة لمدينة و غتبدل الصحاب و جيران المهم قالت لي انا نوض نوجد لعشا غنمشي نبدل حوايجي تشوفيني دخلت لكوزينة تبعيني باش تعاونيني و نوجدو لعشا و شي اكلة معتبرة نختمو بيها هاد الدار و هاد المدينة و هاد لحومة دموع بغاو ينزلو ليا من قالت هكدا عنقاتني و قالت لي كوني قوية و ماعمرك تربي لكبدة علی شي حد حيت غتعيشي حياتك عداب قالت لي هاد لكلمة تفكريها و كل خطوة ا ديريها فكري فهاد لكلمة ما اربيش لكبدة فهمتيها نتي مزال صغيرة مزال غتكبري غتعيشي دي شوز يقدرو يكونو ساهلين يقدرو يكونو صعاب غي تفكري بلي ماماك حبيبتك مغتخليكش كيف دار لحمار تاع باك قلت ليها ماما علاش قلتي علی بابا حمار ماما عفاك عاودي لي شويا علی بابا را مكنعرفوش و باغا نشوف غا وجهو كي داير متحرمينيش من هادشي تعصبات و تقلقات قالت لي لا لا لا مغتعرفيهش و معمرك اتعرفيه سدي عليا هاد لخرا انا مشيت نبدل

المهم دخلات لكوزينة تبعتها قالت لي شنو تشهيتي تاكلي قلت ليها نتي عيانة ا ماما غا لي وجدتي ناكلوه قالت لي نصاوبو كفتة ب لاصوص ولا ندير ليك طاجين لحم بجلبانة و بطاطة و لا بغيتي دجاج مع لخضرة فالفران قلت ليها ماما تا حاجة من هادشي ما بغيتو تقيل بففف قالت لي شنو بغيتي احبيبتي دابة نحضرو ليك مشيت الكونجيلاطور قلبت لقيت واحد الحوته كبيرة قلت ليها بغيت هادي قالت لي ابنتي هاديك را جامدة مغتطلقش دغيا قلت ليها صافي بلاش مبغيتش ناكل باستني و قابت لي اجي غي اجي انا نشوف كي نعمل ليها قالت لي بس غتعاونيني فرحت قلت ليها اه اه فاش قالت لي حلي ثلاجة هزي شبكة و ديري لي غنقولك هزيت شبكة حليت ثلاجة قالت لي هزي 3 ديال البطاطات هزيتهم زيدي 4 د ماطيشات درتهم زيدي 3 د بصلات حطيتهم زيدي 2فلفلات حمرين 2 خضرين و 2 صفرين حطيتهم و زيدي معاك ابنتي لقزبر و لمعدنوس قلت ليها صافي قالت لي شوفي نتي النوع د الخضرة لي غتزيدي قلت ليها لا صافي هادشي مزيان قالت لي وا سدي ثلاجة و نقي ديك الخضرة انا نقي الحوت و نغسلها و نقادها و نوجد ليقامة و نرتب كلشي قلت ليها واخا دابة عرفنا اش غنطيبو غي نقاد و نرتبو كلشي قالت لي صافي يالله بداي تنقي فالخضرة و عنداك دخلي فيها و تبقاي تفتفي قادي داكشي مزيان عارفاني كنعيف و عزيز عليا نقا قلت ليها واخا ا ماما كلشي غيكون مزيان

المهم كلينا جمعت طابلة بقيت كنقوليها اممم اممم ماكلة جات بنينة واعرة قالت لي احم احم بلا مقدمات اش باغا قلت ليها ا لااا ا ماما والو قالت لي غي قولي قلت ليها هضري ليا هلی بابا تعصبات تاني و غوتات عليا و مشات لبيتها نضت تا انا مشيت لبيتي تكيت لقيت غا لحيوط معجبنيش بيتي خاوي كيسفر ولا ممل نضت قلت انمشي عند ماما نقوليها انبات ف بيتها نضت غادة وصلت لباب سمعتها كتهضر ف طيل قلت تا تسالي و ندخل المهم بقيت كنتصنت سمعتها كتقول غي وجد ليا لعاقة و مرة مرة نقدر نبات معاك تم و شوف ليا لا عندك شي كليان را يالله غندخل لمدينة معنديش لكليان و مخصش لفلوس ينقصوني و غنكري قلت مع راسي واش كتهضر مع بابا لله غنشوفو دخلت بدات كتفتف و كتقول اه صافي ا حبيبة غدا انتغداو وغنرحلو صافي كوني هانية و وجدي لينا شي استقبال ف دارنا جديدة ما فهمت والو صافي سكت مقلتش ليها را سمعتك المهم قلت ليها ماما واخا نبات هنا ف بيتك قالت لي اه اجي ا بنتي صافي كلست حداها قالت لي سمحي لي قبيلا غوت علك قلت ليها هانية ا ماما عنقاتني و قالت لي نعسي غدا انفيقو بلش ندورو و من بعد انرحلو لمراكش تم انبداو حياة جديدة مع ناس جداد يالله تصبحي علی علی خير ابنتي نعسي نعسات هي و بقيت كنفكر ف هضرتها لي كانت تقول ف طيل معامن كتهضر الی مكانتش كتهضر مع بابا و معامن غتهضر اينا كليان كتهضر عليهم بقيت كنفكر المشكل معمري سولت ولا عرفت ماما فاش خدامة بقيت موسوسة شوية قلت اعود بالله من شيطان رجيم نمشي نعس صافي را مكاين والو غي لوسواس هدا

صافي صباح فطرنا لبسنا و خرجنا درنا تا عيينا جينا فالعشية عيطات علی واحد سيد هز لينا رحيل و عطاتو العنوان امكن كتعرفو و وصاتو علی شي حد باش يرتبهم فالدار المهم حنا شدينا تران و مشينا وصلنا لماركش صهد خدات لي العصير و درنا شويا قالت لي يالله انمشيو لوطيل انباتو فيه هاد ليلة بيد ما تقادات دار قلت ليها صافي مشينا ريزيرفينا شومبر دخلنا دوشنا و نعسنا فقنا درنا كا سكروط و خرجنا نتعرفو شوية علی لمدينة و ناس د بهجاوة مشينا لجامع لفنا بليل وااو كلو ضواو دنيا عامرة المهم لي بغيتها كتاخدها لي رجعنا لوطيل بقينا كنتفرجو تا دانا نعاس صباح فقنا فطرنا قالت لي يالله دابة دار وجدات انمشيو ليها شدينا طاكسي و مشينا لحومة جديدة المهم لبني فيها قديم بحال داخل لشي بلاصة غريبة حلات باب دخلت ف شي شكل ماشي بحال دار و لا اباغطومون دار قديمة و بيبانها من ستيل لقديم و فيها ديك ضواية كبيرة المهم دار بهجاوية بقينا تم شي عامين كبرت شويا ولفت المهم بيخير كيف هنا كيف لهيه مخاصني خير كنقرا مزيان كناكل كنشرب ماما مهليا فيا الحمد لله المهم صافي ولفت مراكش و ولفت ناسها المهم بقيت مواصلة قرايتي و ما عمري فكرت نتصاحب و لا ندير شي دري امي ديالي يعني كنت بنت شادة تيقارهم كبرت و وعيت و زدت زيانيت الشعورات كنشبه لماما ف كلشي المهم وصلت لباك خديتو ب موصيو كيف لعادة ضروري من لفشوش درنا حفلة قالت لي ماما اش بغيتي فالكادو قلت ليها موطور قالت لي مالك ولد قلت ليها وا شري طوموبيل و تبقا ليا وليك

المهم دازت ليام كبرت زيانيت وليت كنخرج ندور مع صحاباتي ولفت مراكش تعلمت شي كليمات بالمراكشية مهم عايشة بيس واحد نهار جاو شي ناس جداد لحومة راجل و ولدو و تا هو معندوش مو المهم فاش حطو رحيل كنت انا خارجة جيت صونات لي عشيرتي نهيلة قالت لي سعداتك قلت ليها علاش قالت لي ناااري أ بسمة جا حداكم واحد دري لووز بيض و داير لحية واو جاركم جديد قلت ليها تا نتي خلعتيني هادشي لاش معيطا ليا سيري تخراي و قطعت صافي نعست فصباح من فقت لقيت ماما موجدا ليا لفطور قبل ما تخرج فطرت لبست حوايجي كيف العادة غي لحطات لملاح و الماركات خرجت مشيت لافاك دخلت بان لي واحد دري جديد معانا و نفس نعت لي قالت لي نهيلة المهم عادي اصلا انا مكنتصاحبش فاش غيفيدني لكان هو المهم سلات الحصة خرجنا شديت طاكسي و جيت لدار تغديت و درت بروغرام فالعشية نخرج نتعشا مع لبنات تكيت شويا وصلات لوقيتة لبست حوايجي قاديت شعري و الماكياج و خرجت يالله حليت لباب بان لي نفس دري لي شفت ف لافاك حط موطورو قدام لباب و غيدخل دزت من حداه قالي قولي غي سلام مديتهاش فهضرتو و زدت سيد باينة زهواني المهم مشيت ضحكت نشطت تعشيت و صلات تسعود جيت لدار و دخلت مالقيتش ماما كنصوني ليها طيل طافي أو فين اتكون مشات المهم مشيت درت شي لعيبة خفيفة تعشيت بيها و كلست مكونيكطيا و كنتفرج تشوشت شويا عاودت صونيت جاوبتني قلت ليها ماما فينك را تشوشت علك قالت لي بنتي را خرجت معطلة من لخدمة و مشيت مع صاحبتي لدار انبات معاها قلت ليها اممم ماموالفاش ليك تخليني بوحدي قالت لي وا غي ليوم اكبيدتي را خليت ليك لفلوس تم عمري لمكانة باش تفيقي بكري صافي قطعت و بقيت كنفكر ف الهضرة ديال شحال هدا و دابة المهم قلت ماشي مشكل نوض ندير شي فلم و نعس

المهم بقيت كنتفرج تا داني نعاس كيف لعادة كنفيق صباح كنفطر و كنمشي لافاك كنقرا عاود كنشوف نفس لكمارة ديال داك خونا تا لواحد نهار وقف عليا قالي بغيت نمرتك قلت ليه لا سمحلي منقدرش نعطيها ليك قالي غي مرة مرة نتقهواو و نخرجو قلت ليه دارنا عامرة بالقهوة مرة مرة نعصر و نشرب غا سير قالي باينة قاصحة ماشي من مراكش قلت ليه تا نتا ماشي من مراكش قالي واش متأكدة مغتعطينيش نمرة قلت ليه صون بوغ صون غير سير صافي مشا جات نهيلة قالت لي مالو قلت ليها باغي يتفلا بغا نمرة قالت لي علاش معطيتيهاش ليه قلت ليها واش معندي شغل انبقا تاني نتبلبل و كل مرة فين غادا فين كنتي علاش و كيفاش انا مكيعجبنيش هادشي باغا نكون ليبغ كي ماما ما عندي ما ندير بكحل راس قالت لي غي كتقولي نتي معقدة من دراري قلت ليها انا معقدة وا بصحتي قالت لي نخرجو ليوم كاينة واحد صوارية قلت ليها لا مكيناش ماما و لفلوس مكافيينيش قالت لي غي ياالله علی حسابي قلت ليها ألا والو منمشيش قالت لي وا لي بان ليك نتي تعرفي المهم شديت تاني طاكسي و وصلت لدار لقيت خونا كالس مع دراري د لحومة باش تا هو يدير بلاصتو دزت حانية راسي قلت سلام و كملت حليت دخلت وجدت لغدا تغديت و كيف ديما ضروري نتكونيكطا طلعت لبيتي شعلت لبيسي و بقيت كنهضر مع لبنات تا داني نعاس نعست ما فقت تا ل 5 فقت هبطت لتحت لقيت ماما جات و صاوبات كيكة و موجدا لي كسكروط من نفيق مهم غسلت وجهي بستها و عنقتها كلينا قالت لي عندك شي بروغرام ليوم قلت ليها لا والو قالت لي اش بان ليك نخرجو قلت ليها اه مرحبا قالت لي واش سكنو شي جيران جداد حدانا سمعت صداع قبيلا قلت ليها اه را واحد الرجل و ولدو قالت لي مزيان كيف داير دري قلت ليها منعرف ليه مكنشوف فيه تا شوفة قالت لي احياني كون راطاح فيك قلت ليها وا الصراحة وقف عليا و معطيتوش وقت قالت لي حمارة علاش معطيتيهش وقت من ليوم اتبقاي تلبسي و تفركسي لكان بوكو حبة و بوقوص طيحيه واخا غي يعمر علينا دار هانتي تشوفي حنا بوحدنا بلا رجل ف دار نقزت قلت ليها من جبدتي هاد الموضوع د رجال و صافي انا عيييت صبرت صغري كامل و كنتي ديما كتغوتي عليا و كنسكت و هاد لمرة مغنسكتش قولي لي شي حاجة علی بابا باغا نعرف غي سميتو لله يرحم الوالدين قالت لي صافي تا انا عييت وهاد لحمل تقال خايفة شي نهار نودع هاد الحياة و تبقاي وحيدة بين دياب